كتير مننا بيحاول يصحى بدرى كل يوم لكن مهما ينام بدرى برده بيصحى متأخر. لو انت بتشتغل او بتدرس او حتى فى اجازة ونفسك تتعود تصحى بدرى عن معادك عشان تنجز اكتر و كل مرة بتفشل، جرب الخطوات دى:
حدد انت محتاج تنام كام ساعة -فى دراسات بتقول انك محتاج من 6 الى 8 ساعات و دراسات بتقول من 7 الى 9 ساعات من النوم. من ناحية تانية فى علماء توصلوا الى ان جسمك محتاج فترات من ساعة و نص عشان تصحى فايق، مثلا تنام 7 ساعات و نص او 9 ساعات. لكن فى علماء تانيين خالص قالوا ان كل شخص مختلف عن التانى، يعنى ممكن انسان تكون كفايته من النوم 6 ساعات بس و جسمه بيكون متعود و مرتاح على كدة. الخلاصة انك انت اللى تحدد بترتاح و تصحى نشيط بعد كام ساعة و لما تحدد هتقدر تجبر نفسك على الصحيان بعد عدد الساعات دى. -ابدأ بالتدريج، يعنى مش بعد ما كنت بتنام 10 ساعات تنام فجأة 7 لأن ده هيلخبط جسمك. ابدأ بالنوم 9 ساعات و نص بعدين قلل الفترة مع الايام لحد ما توصل لعدد الساعات اللى انت عايزها.
خطط هتعمل ايه لما تصحى
-الصحيان بدرى فى حد ذاته ممكن ميكونش حافز يخليك تنام عدد ساعات اقل. خطط هتعمل ايه لما تصحى بدرى و فكر فى الخطة دى طول الوقت. مثلا هتلعب رياضة، هتقرا كتاب، هتكتب يومياتك، هتمارس هواية قديمة مكنتش لاقى ليها وقت، هتنجز فى مذاكرتك او شغلك، هتتعلم حاجة جديدة، هتحضر فطار صحى، هتتقن لغة معينة، هتقعد فى البلكونة و تتأمل او تسمع موسيقى، هتخلصى شغل البيت اللى وراكى، هتبدأ بتنفيذ مشروعك او تعمل اى حاجة تانية فى دماغك.
-اكتب من بليل خطة اليوم اللى بعده و كون محدد فيها و احسب هتاخد منك وقت قد ايه عشان تصحى بسرعة و متفضلش كسلان فى السرير.
-كل ما تحس بتردد فى انك تقوم او عقلك يقولك تنام تانى، افتكر خططك و قوم فورا و متديش فرصة لدماغك تفكر كتير.
اظبط المنبه
اظبط المنبه على المعاد اللى المفروض تصحى فيه عشان متروحش عليك نومة و ممكن فى البداية تظبطه بدرى عن معادك بربع ساعة عشان تدى نفسك فرصة تفوق، المهم تقوم فعلا متفضلش تأخر المنبه او تظبطه على مواعيد تانية.
فوق نفسك
حاول تفوق نفسك اول ما تصحى عشان مترجعش تنام تانى، مثلا وضب سريرك او اغسل وشك او اطلع فى البلكونة و شم هوا نضيف او اعمل رياضة او حضر فطار صحى او اعمل اى حاجة تانية بتصحصحك.
قلل الكافايين
قلل من المنبهات اللى بتاخدها طول اليوم و خاصا بليل و حاول قبل النوم تشرب حاجات مهدئة تساعدك على النوم بشكل افضل زى اللبن الدافى و الاعشاب زى الكاموميل.
اعمل مجهود طول اليوم
لما تعمل مجهود طول اليوم بين الشغل و الرياضة و الانشطة التانية، هتتضمن انك بليل تكون تعبان و هتنام على طول فى المعاد اللى انت عايزه من غير ما تفضل تتقلب فى السرير كتير و حاول متدخلش السرير الا و انت نعسان فعلا.
خدلك تغفيلة
القيلولة مهمة جدا عشان تقدر تكمل اليوم فى نشاط و تكون فايق و مصحصح. دراسات كتير اثبتت ان حتى مجرد التغفيل لمدة 10 دقايق بيكون ليه فوايد كبيرة فى انك تصحى نشيط و متحسش بتعب من الصحيان بدرى و على العكس، القيلولة لمدد طويلة بتحسسك بالتعب اكتر و انك نعسان و بتصحى منها مش مركز و مكتئب احيانا.
نام كويس بليل
اعمل الحاجات اللى هتخليك تنام نوم هادى و عميق زى مثلا:
- اقرأ رواية او كتاب لحد ما تنام لو ده بيضمنلك نوم هادى.
- اسمع موسيقى هادية قبل ما تنام.
- ابعد عن الموبيل و الكمبيوتر و التليفزيون قبل النوم مباشرة.
- كل عشا صحى و خفيف قبل النوم بفترة معقولة.
- خد حمام دافى.
- خطط هتعمل ايه لما تصحى.
- قلل الاضاءة تدريجيا و حاول تنام فى اقل اضاءة ممكنة.
- ابعد عنك اى مصدر ممكن يسببلك قلق و انت نايم.
- خلى درجة حرارة الاوضة معقولة عشان متقلقش و انت نايم من البرد او الحر.
- خلى فى مصدر اضاءة طبيعية خفيف عشان ضوء النهار يحمسك انك تصحى بدرى و صوت العصافير هيحسسك بتفاؤل و سعادة.
خليك واقعى فى تخطيط اللى هتعمله الصبح
متخططش لاكتر من حاجة تعملها لما تصحى و خليك واقعى فى تحديد اهدافك لانك لو صحيت بدرى و معملتش الحاجات اللى كنت عايز تعملها هتحس باحباط و هترجع تصحى متأخر تانى. من ناحية تانية انت ممكن تلزم نفسك بالصحيان بدرى من خلال اهداف معينة زى مثلا انك تروح الجيم و تحضر التدريبات اللى بتكون الصبح او انك تسجل نفسك فى اى نشاط بيتعمل بدرى.
حفز نفسك
شوف مين من الناس اللى حواليك بيصحى بدرى و بيعمل ايه و خده مثال يحفزك و ممكن تقرا الحاجات اللى اتقالت عن الصحيان بدرى و فوايده زى روبن شارما مثلا بيقول: “خليك من الناس القليلة اللى بتصحى الساعة 5 و اكسب معركة السرير” و بنيامين فرانكلن بيقول: “هيكون عندك وقت طويل تنام فيه، لما تموت!”.
المغزى ان الحياه قصيرة و فيها حاجات كتيرة تتعمل فمتضيعش عمرك فى النوم
تعليقات
إرسال تعليق